विपश्यना साधनाको प्रारम्भिक दिनहरूमा शरीरको बाहिरी भाग (शिरदेखि पैतलासम्म र पैतलादेखि शिरसम्म) लाई एकएक इन्च गरी टुक्र्याउँदै शरीरको बाह्य क्षेत्रमा नै संवेदनाहरू बोध गरिन्छ तर जब तपाईं कायको बाह्य क्षेत्रलाई सूक्ष्म, सूक्ष्मतर र सूक्ष्मतम एकाइमा टुक्र्याउँदै जानुहुन्छ शनैःशनैः तपाईं कायका भित्री क्षेत्रमा पनि संवेदना उत्पत्ति भएको बोध गर्नुहुन्छ । जब तपाईंको कायको भित्री क्षेत्रमा संवेदना उत्पन्न हुन्छ त्यस्तो स्थितिमा तपाईं कायको भित्री क्षेत्रमा उत्पन्न भइरहेका संवेदनामाथि पनि क्रमबद्ध साधना गर्न प्रारम्भ गर्नुहुन्छ ।
स्मरणरहोस् (मेरो अनुभवमा) जति सहजतापूर्वक तपाईं कायको बाह्य क्षेत्रमा संवेदनामाथि साधना गर्न असमर्थ हुनुहुन्छ त्यति सहजतापूर्वक कायको भित्री भागमा पनि कायानुपश्यना साधना गर्न असमर्थ रहनुहुन्छ तर जब तपाईं कायको बाहिरी क्षेत्रको संवेदनालाई दीर्घकालसम्म निरन्तरता दिइरहनुहुन्छ वा जब तपाईं कायको बाह्य क्षेत्रलाई सूक्ष्म, सूक्ष्मतर र सूक्ष्मतमरूपमा टुक्र्याउँदै जानुहुन्छ तपाईं सहजरूपमा नै कायको भित्री क्षेत्रमा उत्पन्न संवेदनामाथि पनि विपश्यना साधना गर्न सक्षम हुनुहुनेछ । दीर्घकालको विपश्यना साधनापश्चात् कायको बाह्य क्षेत्रमा कायानुपश्यना प्रारम्भ गर्ने बित्तिकै तपाईं कायको भित्री क्षेत्रका संवेदनाप्रति पनि स्वतः समभावी बन्दै जानुहुन्छ ।